Jeremiah 48

Ilizwi NgeMowabi

1Mayelana leMowabi: UJehova uSomandla, uNkulunkulu ka-Israyeli uthi: “Maye kuyo iNebho ngoba izachithwa. IKhiriyathayimi izayangeka njalo ithunjwe; inqaba izayangeka ibhidlizwe.

2IMowabi kayiyikudunyiswa futhi; eHeshibhoni abantu bazaceba ukubhidlika kwayo besithi, ‘Wozani sitshabalalise isizwe lesiyana.’ Lawe, wena Madimeni uzathuliswa; inkemba izaxotshana lawe.

3Zwanini ukukhala okuvela eHoronayimi; ukukhala komonakalo omkhulu lencithakalo.

4IMowabi izachitheka; abancinyane bayo bazakhala.

5Baqansa ngendlela eya eLuhithi, bahamba belila kabuhlungu, emgwaqweni owehlela eHoronayimi, kuzwakala ukukhala okulosizi ngenxa yokuchitheka.

6Balekani! Gijimani lisilise ukuphila kwenu; wobani njengesihlahla enkangala.

7Njengoba lithembe izenzo zenu lenotho yenu lani futhi lizathunjwa, loKhemoshi uzakuya ekuthunjweni kanye labaphristi bakhe lezikhulu zakhe.

8Umchithi uzafika emadolobheni wonke, njalo akukho dolobho elizaphepha. Isigodi sizatshabalaliswa, lamagceke azaqothulwa ngoba uJehova usekhulumile.

9Fakani itshwayi kuyo iMowabi ngoba izachitheka; amadolobho ayo azakuba ngamanxiwa angelamuntu ohlala kuwo.

10“Yeka isithuko kulowo oyekethisayo ekwenzeni umsebenzi kaJehova! Yeka isithuko kulowo ogodla inkemba yakhe ekuchitheni igazi!

11“IMowabi ibiphumule kusukela ebutsheni bayo njengewayini elisele phezu kwezinsipho zalo, elingathelwanga kwenye imbiza lisuswa kwenye – kayithunjwanga. Ngakho inambitheka njengakuqala, iphunga layo kaliguqukanga.

12Kodwa izinsuku ziyeza,” kutsho uJehova, “lapho ngizathuma abantu abathulula okusembizeni, njalo bazayithululela phandle; bazachitha okusezimbizeni zayo bazimahlaze izimbiza zayo.

13Lapho-ke iMowabi izayangeka ngoKhemoshi njengokuyangeka kwendlu ka-Israyeli lapho babethembe iBhetheli.

14“Lingatsho kanjani na ukuthi, ‘Singamabutho, amadoda alesibindi empini na’?

15IMowabi izachithwa, amadolobho ayo ahlaselwe; amajaha ayo aqinileyo azacakazelwa phansi abulawe,” kutsho uJehova, obizo lakhe nguJehova uSomandla.

16“Ukuwa kweMowabi sekuseduze; umonakalo wayo uzafika ngokuphangisa.

17Ikhaleleni lonke lina elakhelene layo, bonke abalwaziyo udumo lwayo, lithi, ‘Yeka ukwephuka kwenduku yobukhosi elamandla, yeka ukwephuka kodondolo oluhle kakhulu!’

18“Yehlani ebukhosini benu lihlale emhlabathini owomileyo, lina elihlala eNdodakazini yaseDibhoni. Ngoba lowo ochitha iMowabi uzakuzalihlasela adilize amadolobho enu avikelweyo.

19Lina elihlala e-Aroweri, manini ngasemgwaqweni lilinde. Buzani indoda ebalekayo lowesifazana obalekayo; babuzeni lithi, ‘Kwenzakaleni na?’

20IMowabi iyangekile, ngoba ichithekile. Lilani likhale! Bikani ngase-Arinoni ukuthi iMowabi itshabalalisiwe.

21Ukwehlulela sekufikile emagcekeni eHoloni, leJahiza laseMefahathi,

22eDibhoni, leNebho laseBhethi Dibhilathayimi,

23eKhiriyathayimi, leBhethi Gamuli laseBhethi Meyoni,

24eKheriyothi kanye laseBhozira kuwo wonke amadolobho aseMowabi, aseduze lakhatshana.

25Uphondo lweMowabi luqunyiwe, ingalo yalo yephuliwe,” kutsho uJehova.

26“Idakiseni ngoba idelele uJehova. IMowabi kayizibhixe ngamahlanzo ayo; kayibe yinto yokuhlekwa.

27U-Israyeli wayengasinto yokuhlekisa kuwe na? Watholakala ephakathi kwamasela na, ukuba unikine ikhanda lakho ngokweyisa sikhathi sonke lapho ukhuluma ngaye?

28Tshiyani amadolobho enu lihlale emadwaleni, lina elihlala eMowabi. Wobani njengejuba elakhela isidleke salo emlonyeni wobhalu.

29“Sizwile ngokuzigqaja kweMowabi, ukuziqakisa kwayo lokuzazisa kwayo, ukuzigqaja kwayo lokuzikhukhumeza kwayo, kanye lokuziphakamisa kwenhliziyo yayo.

30Ngiyakwazi ukudelela kwayo, kodwa kuyize,” kutsho uJehova, “lokuzincona kwayo akusizi lutho.

31Ngakho-ke ngiyalila ngeMowabi, ngikhalela iMowabi yonke, ngililela abantu baseKhiri Haresethi.

32Ngiyalikhalela, njengeJazeri ilila, lina zivini zaseSibhima. Izingatsha zenu zinaba zifike olwandle, zafika olwandle lwaseJazeri. Umchithi usehlele phezu kwezithelo zakho ezivuthiweyo laphezu kwamavini.

33Ukuthokoza lokuthaba akusekho ezivinini lasemasimini eMowabi. Ukugeleza kwewayini ezikhamelweni sengikumisile; kakho ozalikhama eklabalala ngentokozo. Lanxa kulokuklabalala akusikho kuklabalala kwentokozo.

34“Umsindo wokukhala kwabo uyaphakama uvelela eHeshibhoni usiya e-Eliyalehi laseJahazi, uvela eZowari usiyafika eHoronayimi le-Egilathi Shelishiya, ngoba lamanzi aseNimirimi asecitshile.

35EMowabi ngizabaqeda labo abanikela iminikelo ezindaweni eziphakemeyo batshisele labonkulunkulu babo impepha,” kutsho uJehova.

36“Ngakho inhliziyo yami ikhalela iMowabi njengemfegwana; iyakhala njengemfegwana ikhalela abantu beKhiri Haresethi. Inotho ababeyizuzile kayisekho.

37Amakhanda wonke aphuciwe lezindevu zonke zigeliwe; izandla zonke zisikiwe lezinkalo zonke zigqokiswe amasaka.

38Phezu kwezimpahla zonke zezindlu zaseMowabi lasemagcekeni kazulu, akulalutho ngaphandle kokukhala, ngoba iMowabi ngiyibulele njengembiza engafunwa muntu,” kutsho uJehova.

39“Yeka ukuphahlazwa kwayo! Yeka ukulila kwabo! Yeka ukufulathela kweMowabi ilehlazo! IMowabi isibe yinto yokuhlekwa; into yokwesatshwa yibo bonke abakhelane layo.”

40UJehova uthi: “Khangela! Ukhozi lwehlela phansi ngesiqubu, lwelulele izimpiko zalo phezu kweMowabi.

41IKheriyothi izathunjwa, lezinqaba zithunjwe. Ngalolosuku izinhliziyo zamabutho aseMowabi zizakuba njengenhliziyo yowesifazana ohelelwayo.

42IMowabi izachithwa ingabe isaba yisizwe ngoba yadelela uJehova.

43Ukwesaba lomgodi kanye lomjibila, kulilindele lina bantu baseMowabi,” kutsho uJehova.

44“Loba ngubani obalekela ukwesaba uzawela emgodini, loba ngubani ophuma emgodini uzabanjwa ngumjibila; ngoba ngizakwehlisela phezu kweMowabi umnyaka wokujeziswa kwayo,” kutsho uJehova.

45“Emthunzini waseHeshibhoni ababalekayo bayema kungekho sizo, ngoba umlilo usuphumile eHeshibhoni, ilangabi elivela phakathi kwakoSihoni; litshisa amabunzi eMowabi izinkakhayi zamaqhalaqhala alomsindo.

46Maye kuwe! wena Mowabi! Abantu baseKhemoshi babhujisiwe; amadodana athunjiwe lamadodakazi akho athunjiwe.

47“Kodwa inhlanhla yeMowabi ngizayibuyisela ezinsukwini ezizayo,” kutsho uJehova. Ukwahlulelwa kweMowabi kuphelela lapha.